მთავარი

„ფონდი რომ გაგვაჩნია, არ ნიშნავს იმას, რომ ბინები ვარიგოთ“ – ბათუმის მერიის საბინაო პოლიტიკა

29.04.2016 • 2842
„ფონდი რომ გაგვაჩნია, არ ნიშნავს იმას, რომ ბინები ვარიგოთ“ – ბათუმის მერიის საბინაო პოლიტიკა

გასულ კვირას ბათუმის საკრებულოს უნდა ემსჯელა საკონსტიტუციო სასამართლოს მოსამართლისთვის 125 კვადრატული მეტრი ბინის საკუთრებაში გადაცემის თაობაზე. ამ ფაქტმა საზოგადოებაში დიდი ვნებათაღელვა გამოიწვია, განსაკუთრებით უსახლკარო ადამიანებისა. რამდენი საცხოვრებელი ბინა ირიცხება მერიის საბინაო ფონდში, რამდენ კვადრატულ მეტრ ბინას ელოდება მერია კერძო მშენებლობებიდან და ვინ მიიღებს ბინებს ამ ფონდიდან? – თემაზე „ბათუმელებთან“ ისაუბრა მერიის ეკონომიკური სამსახურის უფროსმა, გოგა (ეგარსლან) ლომაძემ.

გოგა ლომაძე

გოგა ლომაძე

ბატონო გოგა, რამდენი კვადრატი მეტრი ფართობი აქვს მერიას ამ დროისთვის საბინაო ფონდის სახით და რამდენ კვადრატს ელოდება მიმდინარე წელს?

ამ დროისთვის მერიის საბინაო ფონდში ირიცხება 3050 კვადრატი, ეს არის 35 ბინა.

რა შემთხვევაში ითხოვს მერია საბინაო ფონდს ბიზნესისგან და 2016 წელს რამდენი ბინა აქვს მერიას მისაღები კერძო მშენებლობებიდან?

საბინაო ფონდი იქმნება შემდეგნაირად: მუნიციპალიტეტის საკუთრებაში არსებული მიწები როცა გადის აუქციონზე, იდება პირობა, რომ ამ მიწის ნაკვეთზე უნდა აშენდეს საცხოვრებელი სახლი, რომლის გარკვეული პროცენტი გადაეცემა ბათუმის მერიას. აქედან ივსება საბინაო ფონდი. მომავალი წლისთვის დაახლოებით 6 000 კვადრატს ველოდებით, რაც დაახლოებით 80 ბინაა, ორი წლის შემდეგ კიდევ ველოდებით 3 000 კვადრატს, რაც ასევე დაახლოებით 40 ბინაა. მიმდინარე წელს გავყიდეთ კიდევ ერთი მიწის ნაკვეთი, 36 თვე აქვს მესაკუთრეს მშენებლობისთვის და ამ ბინის დასრულების შემდეგაც, საცხოვრებელი სახლის 15 პროცენტი მერიის საბინაო ფონდში გადმოვა. ბინის რაოდენობა პროექტის დასრულების შემდეგ დაზუსტდება.

2015 წელს „ბათუმელებმა“ გაარკვია, რომ ქალაქის საკუთრებაში არსებული 53 ბინიდან 51 იყო დაკეტილი. ამ ერთი წლის განმავლობაში ხომ არ გადაუცია მერიას ეს დაკეტილი ბინები მოქალაქეებისთვის?

ამ ფონდიდან ბინები გაიცა იმ ოჯახებზე, რომლებიც ბოტანიკურ ბაღში ცხოვრობდნენ და გზის მშენებლობის გამო მოუხდათ საცხოვრებლის დატოვება. ყველა ბინა გაიცა მათზე.

თუ გაქვთ კონკრეტული მონაცემი, რამდენი ადამიანია უსახლკაროდ და რას გეგმავს მერია ამ ადამიანების საცხოვრებლით უზრუნველსაყოფად?

ეს მონაცემები მერიის სოციალურ სამსახურს აქვს, ჩვენთანაც შემოდის ხოლმე განცხადებები, მაგრამ დათვლას სოციალური სამსახური აწარმოებს.

თქვით, რომ მერიამ ამ დროისთვის აქვს 35 ბინა, ერთ წელიწადში კი მინიმუმ 120 ბინა დაემატება. ვინ მიიღებს ამ ბინებს, გაქვთ ამის შესახებ დაზუსტებული მონაცემები?

ისევე როგორც წინა წლებში, ეგ ბინებიც გამოიყენება ინფრასტრუქტურული პროექტების განხორციელების დროს, როდესაც კონკრეტული მესაკუთრეების სახლები მოხვდება აღებაში. 2014 წელს ჩვენ გავეცით 80 ბინა. თუ ნახავთ საკრებულოს მიერ დამტკიცებულ გზების გაყვანის გეგმას, იქ თვალნათლივ ჩანს, რა ოდენობით კერძო საკუთრებას შეეხება ეს. დეტალები ზუსტდება პროექტების განხორციელების დროს.

როცა „იაფი სახლის“ მშენებლობის შესახებ ინფორმაცია გავრცელდა, მერიაში 1700 მოქალაქის განცხადება დარეგისტრირდა, ისინი აცხადებდნენ, რომ საჭიროებდნენ ბინით უზრუნველყოფას. პერმანენტულად იმართება მოქალაქეების საპროტესტო აქციები ბინის მოთხოვნით. რას აპირებს მერია ამ მოქალაქეების მხარდასაჭერად?

მერიას გარკვეული საბინაო ფონდი გააჩნია და მომავალშიც ელოდება შევსებას, მაგრამ ეს იმას არ ნიშნავს, რომ ბინები დარიგდება უსასყიდლოდ ან გარკვეული კატეგორიისთვის. ეს საჭიროა კონკრეტული ინფრასტრუქტურული პროექტების განხორციელებისთვის.

თვითმმართველობა თავისი რესურსებით ვერ იზრუნებს ამაზე, სახელმწიფო დონეზე უნდა გადაწყდეს, თუ რა ღონისძიებები იქნება გასატარებელი. სოციალურად დაუცველი ფენისთვის თვითმმართველობა თავისი რესურსებით ვერ შეწვდება ყველას საჭიროებას. შესაბამისად, ეს საკითხი ვერც თვითმმართველობის დონეზე გადაწყდება. საბინაო ფონდი რომ გაგვაჩნია, არ ნიშნავს იმას, რომ ბინები ვარიგოთ.

თუმცა არის შემთხვევები, როცა მთავრობა უპრობლემოდ გადასცემს ბინას კონკრეტულ სახელმწიფო მოხელეებს. ბოლო შემთხვევას გავიხსენებ, როცა მთავრობამ მოსამართლე მერაბ ტურავასთვის მოითხოვა ბინა. ვინ უნდა იყოს უფრო პრიორიტეტული ქალაქის ხელისუფლებისთვის _ სოციალურად დაუცველი უსახლკარო მოქალაქე თუ სახელმწიფო მოხელე?

მოსამართლისთვის ბინის გაჩუქებას არ აპირებდა მერია. ჩვენ გვითხრეს, რომ სჭირდებოდათ ეს ბინა და საკითხი წარედგინა საკრებულოს გადასაწყვეტად. საკრებულოს უფლება აქვს, ეს საკითხი ან დადებითად გადაწყვიტოს, ან უარყოფითად.

ბოლო კითხვა „იაფ სახლზე“ მინდა დაგისვათ, რომელიც მერიის ერთადერთი სოციალური პროექტია ბინებთან დაკავშირებით, თუმცა სამი წელია ვერ მოახერხა იმის დადგენა, რა კატეგორიის მოქალაქეები მიიღებენ ამ სახლში ბინას…

გასულ პარასკევს ჩატარდა კომისიის სხდომა. ახლა პირველად ჩარჩო დოკუმენტს შვეიცარიის განვითარების ფონდი მისცემს საბოლოო სახეს. ამ სახლში ბინას მიიღებენ ის მოქალაქეები, ვისაც აქვთ გარკვეული შემოსავალი და ცხოვრობენ ქირით. იმ თანხას, რასაც ქირაში იხდიან, გამოიყენებენ „იაფ სახლში“ გადაცემული ბინის გამოსასყიდად. ბინა იქნება 80 ერთეული.გარკვეული დოკუმენტი მოვამზადეთ, რომელიც დამუშავდება. მოქალაქეების განცხადებების მიღება ჯერ არ მიმდინარეობს. პროგრამა იქნება საჯარო და გამოქვეყნდება.

გადაბეჭდვის წესი


ასევე: